Nan yon nòt Biwo Entegrasyon Nasyonzini an Ayiti (BINUH) ak òganizasyon dwa moun pibliye ayè lendi 7 avril 2025, genyen omwen 262 moun mouri ak 66 lòt blese, presizeman gen omwen 53% ki sòti nan popilasyon sivil ak 47% lòt ki fè pati gwoup kriminèl.
Selon responsab Maria Isabel Salvador fè konnen atravè ankèt yo mennen bandi ak zam yo te vrèman detèmine pou yo fè vyolans sou popilasyon nan Kenskòf, kote yo te simen laperèz nan mitan yo.
Bandi sila yo te pral egzekite fanm ak gason anndan kay ni sa ki t ap pase sou chimen yo pandan plizyè nan yo t ap kouri pou zak vyolans sa a. Anplis, yo boule kadav yo e boule anviwon 200 kay ak 3000 lòt te oblije kouri kite lakay yo. Diplis, bandi yo rive vyole fanm ak tifi pandan yo t ap komèt zak sa yo.
« Gwoup kriminèl sa yo te pran direksyon monn Kenskòf nan objektif pou pran plis espas ak gen kontwòl zonn Petyonvil, kote yo ap chèche afebli otorite pi plis toujou», ekri nan nòt BINUH.
Paralèlman nan dat 27 janvye ki sot pase la, fòs sekirite Ayisyen ak Misyon Miltinasyon ak Soutyen Sekirite (MMSS) te fè entèvansyon an reta, sa ki te lakoz plizyè dega nan zòn Kenskòf.
Selon BINUH, dènyè atak la te fèt ant 24 ak 27 mas nan zòn Kenskòf, sa ki te montre kapasite bandi yo kote yo t ap chèche tabli plizyè selil nan zòn lòt lokalite tankou Tomasen ak Petyonvil.
Selon BINUH genyen plis pase 4 manm fòs sekirite yo pèdi lavi ak 4 lòt blese e yon sòlda MMSS ki blese pandan konfwontasyon yo avèk bandi yo.
Pandanstan, Biwo Entegrasyon Nasyonzini fè konnen gen prezans Leta atravè Direksyon Nasyonal dlo pòtab ak asenisman, ajans Nasyonzini yo avèk òganizasyon non gouvènman Nasyonal ak Entènasyonal, te bay asistans imaniè ak mezi pwoteksyon pou moun ki afekte yo.
« Zak sa yo pa sifi, lè konnen gen viktim vyolans sikolojik sou timoun ak tifi pandan peryòd difisil yo», pou fini nan nòt sa a.
Lawouze Info
0 commentaire